Namminersorlutik Oqartussat

2023-mi Namminersorlutik Oqartussat 7.448 mio. kr.-it aningaasat atorsimavaat. 2022-mut sanilliullugu 152 mio. kr.-inik annikinnerusimapput, 7.600 mio. kr.-it atorneqarsimallutik.

 

Titartakkami 4.1-mi takuneqarsinnaapput 2023-mi Namminersorlutik Oqartussat aningaasat atugaat suliaqarfinnut immikkoortillugit. Naalakkersuisoqarfinni ataasiakkaani allaffissornerit sulianut immikkoortinneqarput. Naalakkersuisoqarfinni Aqutsisoqarfinnilu ataasiakkaani allaffissorneq suliaqarfinnut ilanngussorneqarput.

 

Titartagaq 4.1
Namminersorlutik Oqartussaat aningaasat atugaat sulianut immikkoortiterlugit 2023

Najoqqutaq: https://bank.stat.gl/OFNFUNK

 

Namminersorlutik Oqartussat peqqinnissaqarfik ingerlatarivaat. 2023-mi peqqinnissaqarfik Namminersorlutik Oqartussani nalinginnaasumik pisortat kiffartuussineranni aningaasanik atuiffiunerpaajusimavoq. 1.856 mio. kr.-it peqqinnissaqarfimmut atorneqarsimallutik Namminersorlutik Oqartussat aningaasanik atuinerisa 24,9 pct.-eralugu.

 

2023-mi ilinniartitaanermut aningaasat atorneqartut 1.108 mio. kr.-iusimapput, 2022-mut annikilleriarpoq. Ilinniartitaanermut Namminersorlutik Oqartussat aningaasanik atuinerisa 14,9 pct.-erivaat.

 

Isumaginninneq Namminersorlutik Oqartussat suliaasa pingaarnerit ilagivaat. 2023-mi 935 mio. kr., tassa Namminersorlutik Oqartussat aningaasartuutissaminnut naatsorsuutaani 12,6 pct.-iat tassunga atorsimavoq. Isumaginninnermut tunngasut pineqartut ukuupput; ilaqutariit, meeqqat, inuusuttuaqqat, innarluutillit, utoqqaat, suliffeqarfiit, inissiat, pinaveersaartitsineq kiisalu inuuniarnermut tapit, erninermi ullormusiat, ineqarnermut tapit, peqqissarneq, piffissani aalajangersimasuni suliffissaaleqisarnerup akiorniarnera, siusinaarluni suliunnaarnermusiat, utoqqalinersiat il.il.

 

Nalinginnaasumik pisortat kiffartuussineri aamma aningaasaqarnermut tunngasut Namminersorlutik Oqartussat ingerlataanut pingaarnernut ilaasut kingullersaraat. Tassunga ilaapput; Namminersorlutik Oqartussat ingerlanneqarnerat, tassunga ilaallutik Naalakkersuisut, Aningaasaqarnermut Naalakkersuisoqarfik, Nunanut allanut Naalakkersuisoqarfik il.il. aamma aningaasanik nuussinerit assigiinngitsut. Tassunga aamma ilaapput ass. niuernermi, kiffartuussinerni aamma takornariaqarnermi suliffeqarfinnut tapit kiisalu aalisarnermut, piniarnermut nunalerinermullu tapit. 2023-mi nalinginnaasumik pisortat kiffartuussinerannut aningaasat atorneqartut 2.142 mio. kr.-iupput aningaasaqarnermut tunngasut 800 mio. kr.-iusut.

 

Inissianut tunngatillugu Namminersorlutik Oqartussat aningaasat makkununnga atornerusarpaat; nutaanik sanaartornernut aamma pioreersunik pisortat illuutaanik nutarterinernut. 2023-mi aningaasat tassannga atorneqartut 262 mio. kr.-iusimapput Namminersorlutik Oqartussat aningaasanik atuinerisa 3,5 pct.-erivaat.

 

Takussutissiami 4.1-imi takuneqarsinnaapput Namminersorlutik Oqartussat isertitaat suunerinut aamma aningaasarsiorneq tunngavigalugu agguataarlugit.

 

Takussutissiaq 4.1
Namminersorlutik Oqartussat aningaasat atugaat, aningaasarsiorneq tunngavigalugu agguataarlugit

		2019	2020	2021	2022	2023
		Mio. kr.
1.	Ingerlatsinermut aningaasat atorneqartut ......	6.596	6.981	6.727	6.935	6.991
1.1	Atuinerit katillugit ..........................	3.569	3.846	3.718	3.725	3.787
1.2	Ingerlaavartumik aningaasanik nuussinerit  ....	3.027	3.135	3.009	3.210	3.204
2.	Aningaasaliinermi aningaasat atorneqartut ....	312	462	587	665	457
2.1	Pigisanut nalilinnut aningaasat atorneqartut iluarsisat ................................	243	389	450	522	365
2.2	Aningaasaliissutinik nuussinerit  .............	69	73	137	144	92
A.	Aningaasat atorneqartut katillugit..........	6.908	7.443	7.314	7.600	7.448
3.	Ingerlatsinermi isertitat .....................	7.894	7.607	7.333	7.923	8.155
3.1	Inuussutissarsiutinit isertitat .................	336	370	360	359	376
3.2	Pigisanit nalilinnit isertitat ...................	873	322	370	399	441
3.3	Nioqqutissiornermi aamma eqqussuinermi akileraarutit ..............................	1.207	1.239	1.233	1.389	1.460
3.4	Ingerlaavartumik akileraarutit ................	1.190	1.390	1.239	1.398	1.378
3.5	Ingerlaavartumik aningaasanik nuussinerit allat	4.287	4.287	4.131	4.378	4.498
4.	Aningaasaliissutinit isertitat ..................	-	-	-	-	-
B.	Isertitat katillugit..........................	7.894	7.607	7.333	7.923	8.155
C.	Ingerlatsinermi sinneqartoorutit (3-1) (sipaakkat tamakkerlugit)..................	1.298	627	606	988	1.164
D.	Ingerlatsinermi aamma aningaasaatinit/pigisanit nalilinnit sinneqartoorutit (B-A) (atorneqarsinnaalersut, ilanngaatissat ilanngaatigereerlugit)......................	986	165	19	323	707

Malugiuk. Naatsorsuutit ataatsimoortinneqarput, taamaattumik ENS 1995 malillugu suliarineqarmata pisortaqarfiit akornanni nuussinerit ilaanngillat. Taamaasilluni 2023-mi Namminersorlutik Oqartussani ingerlatseqatigiiffinnut immikkut inatsisitigut akisussaaffimmik tunineqarsimanngitsunut aningaassaliissutit 15 mio kr.-iusut kisitsisinut paasissutissanut ilanngunneqanngillat.

Najoqqutaq: https://bank.stat.gl/OFNREAU aamma https://bank.stat.gl/OFNREAI

 

2023-mi Namminersorlutik Oqartussat 707 mio. kr.-inik ingerlatsinermut aningaasaliinermullu sinneqartooruteqarput. 2022-mut sanilliullugu aningaasat atorneqarsinnaalersut annertuseriangaatiarsimapput. Annertunerusumik sinneqartoorutit annertusinerinut pissutaasut tassaapput; isertitat annertusineri, pilersuinermi aamma eqqussuinermi akileraartutit annertusineri, pigisanit nalilinnit inuussutissarsiutiniillu isertitat aamma nuussinerit ingerlaavartut. Taakku ilutigalugit aningaasaliissutinut aningaasartuutit apparput annertuumik, ingerlatsinermut aningaasartuutit annikinnerusumik qaffannerinik kinguneqarlutik. Ingerlatsinermi sinneqartoorutit aamma sipaakkat tamakkerlugit-mik taaneqartarput, 2023-mi 175 mio. kr.-inik qaffapput 1.164 mio. kr.-inut annertussuseqalerlutik.

 

Pisortat aningaasaqarneranni aningaasat atorneqarsinnaalersut nunatta karsiata naatsorsuutaani DAU-saldo-mut (DAU ingerlatsineq (drift), Anlæg (sanaartorneq) aamma Atortitsinermit (Udlån) naalisagaavoq) taputartuunneqassanngillat, taanna nunatta karsiata ukiumut naatsorsuutaani 431 mio. kr.-inik 2023-mi sinneqartooruteqarfigineqarsimasutut nalunaarutigineqarsimavoq. Pisortat aningaasaataanni atorneqarsinnaalersut (fordringserhvervelse) 707 mio. kr.-iuneranut, Nunatta karsiani nuunneqarsimasut ilaat pisortat aningaasaataanut ilanngunneqartussaanneri, pissutaavoq.

 

Atukkiilluni, allanngortitserisoqarnissaanut sillimmatit, aktianik pisinerit, kontotimiit kontotimut allamut nuussinerit, ukiumiit ukiumut nuussinerit, Namminersorlutik Oqartussani ingerlatseqatigiiffiit immikkut inatsisitigut akisussaaffimmik tunineqarsimanngitsunut aningaasaliissutit Sanaartornermut aamma Eqqagassanut aningaasaateqarfimmut aningaasaliissutit katillugit 2023-mi 276 mio. kr.-iusimapput. Pisortat aningaasaqarneranni, Sanaartornermut aamma Eqqagassanut aningaasaateqarfimmut aamma Piffissaq ungasinnerusoq eqqarsaatigalugu aningaassaliissuteqarnissamut Aningaasaateqarfik aningaasartuutinut, pigisanut aningaassaliissutinuunngitsoq, atorneqaraangata aningaasaliissutinut aningaasartuutitut naatsorsuutigineqartarput. Taakku suli atorneqartinnagit sipaakkatut naatsorsuutigineqartarput.

 

Suliaqarnermi aningaasat atorneqartut (atuinernut aningaasat atorneqartut) 2023-mi 63 mio. kr.-inik qaffapput 3.787 mio. kr.-inngorlutik, 1,7 pct.-imik qaffalutik. Taakkununnga ilaapput tunisassiornermi sulisunut aningaasarsisitsinerit taakku 2023-mi 98 mio. kr.-inik qaffassimapput 2.215 mio. kr.-inngorsimallutik aamma atuinerit 2023-mi 7 mio. kr.-inik apparsimasut 1.922 kr.-inngorsimallutik. Nioqqutissanik kiffartuussinermillu tunisineq 44 mio. kr.-inik qaffassimavoq 692 mio. kr.-inngorsimallutik 6,8 pct.-imik qaffassimallutik.

 

Aalajangersimasunut nutaanut aningaasaliinerit aamma pisinerni tunisinerni aningaasat atorneqartut 157 mio. kr.-inik apparsimapput 365 mio. kr.-inngorsimallutik 30,1 pct.-inik apparsimallutik. Aningaasaliissutinik nuussinerit 52 mio. kr.-inik apparsimapput 92 mio. kr.-inngorlutik. Namminersorlutik Oqartussat aningaasaliissutaat katillugit 209 mio. kr.-inik apparsimapput 457 mio. kr.-inngorlutik.

 

Namminersorlutik Oqartussat isertitaat qaffassimapput 232 mio. kr.-inik 8.155 mio. kr.-inngorsimallutik 2,9 pct.-imik qaffassimallutik. Ingerlaavartumik aningaasanik nuussinerit annertuut EU-meersuupput Qallunaallu naalagaaffianeersuullutik. Nuussinerit 2023-mi 4.498 mio. kr.-iupput. Isertitanit taakkunaniit annertuut kommunit ingerlatsinerannut aningaasaliinerannullu nuunneqartarput. 2023-mi 2.261 mio. kr.-it kommuninut nuunneqarsimallutik.